გორის რაიონის სოფელ კარალეთში მოსახლეობასთან შეხვედრის მიზნით კოალიცია "ქართული ოცნების" ლიდერთა სტუმრობას ინციდენტი მოჰყვა. კარალეთში დევნილთა ჩასახლებაში მისულ პოლიტიკურ ლიდერებს უცნობი პირები დაუპირისპირდნენ. კოალიციიდან კარალეთში კახი კალაძე, მანანა კობახიძე და გია ყარყარაშვილი იმყოფებოდნენ.
ინციდენტში 20-მდე ადამიანი მონაწილეობდა. თავდაპირველად მათ კოალიციის ლიდერებს სიტყვიერი შეურაცხყოფა მიაყენეს, რის შემდეგაც მათ ქვები ტელეკომპანიების: "მაესტროსა" და "თრიალეთის" გადამღებ ჯგუფებს დაუშინეს. "მაესტროს" ადგილობრივი კორესპონდენტის განცხადებით, მომხდარის გამო აპარატურა და ავტომობილები დაზიანდა.
კოალიციის ერთ-ერთი ლიდერი კახი კალაძე მომხდარზე პასუხისმგებლობას პრეზიდენტს აკისრებს. მისი განცხადებით, დაპირისპირებაში მონაწილე პირები მაჟორიტარი დეპუტატის, ბადრი ბასიშვილის ახლობლები და ზონდერბრიგადების წევრები არიან. მისივე თქმით, მომხდარში სამოქალაქო ფორმაში ჩაცმული პოლიციელებიც მონაწილეობდნენ.