"ქრისტიან-დემოკრატიული მოძრაობის" ლიდერი გიორგი თარგამაძე ბიძინა ივანიშვილის მოქალაქეობასთან დაკავშირებით იუსტიციის სამინისტროს მიერ მიღებულ გადაწყვეტილებას არასწორად აფასებს და "ქვეყნის და საზოგადოების ინტერესებიდან გამომდინარე", ხელისუფლებას საკანონმდებლო ცვლილებების განხორციელების ინიციატივით მიმართავს, რომლის მიხედვით, პოლიტიკურ პროცესებში აქტიურობის უფლება ბიძინა ივანიშვილს, როგორც ევროკავშირის მოქალაქეს მიეცემა.

როგორც ქდმ-ის ლიდერმა "პრაიმ-ტაიმის" პრესკლუბში სტუმრობისას განაცხადა, "აუცილებელია, კონსტიტუციაში შევიდეს სპეციალური ცვლილება, რომლის მიხედვითაც ევროკავშირის წევრი სახელმწიფოს წარმომადგენლები იგივე უფლებებით იქნებიან აღჭურვილი, როგორითაც საქართველოს მოქალაქეები".

კერძოდ, მისი აზრით, ცვლილება უნდა შევიდეს კონსტიტუციის იმ მუხლში, რომელიც ასაკობრივ ცენზს უკავშირდება.

"როგორც იცით, ამ ცვლილების განხილვა პარლამენტში უკვე იწყება. თუ ვაიძულებთ ხელისუფლებას, ეს გადაწყვეტილება მიიღოს, ბიძინა ივანიშვილს შესაძლებლობა ექნება, მისი პოლიტიკური კამპანია დააფინანსოს და პოლიტიკურ პროცესებში აქტიური მონაწილეობა მიიღოს. ეს, რა თქმა უნდა, ჯერ-ჯერობით იდეის დონეზეა, თუმცა ამის განხორციელება რეალურია", - განაცხადა გიორგი თარგამაძემ.

მისივე თქმით, "ის და მისი პოლიტიკური ძალა, ისევე, როგორც ქვეყნის სხვა მოქალაქეები, დაინტერესებულები არიან, ადამიანებს არჩევნებში თანაბარ პირობებში მონაწილეობის საშუალება ჰქონდეთ".

გიორგი თარგამაძის განცხადებით, ქდმ თავის წინადადებას ხელისუფლებას იურიდიული ფორმულირებით რამდენიმე დღეში მიაწვდის.