პოპულარულმა რუსმა ტელეწამყვანმა ქსენია სობჩაკმა მეგობრებისგან ფულის სესხება დაიწყო. ამის შესახებ ტელეწამყვანმა მის ბინაში რუსი სამართალდამცველების მიერ განხორციელებული ჩხრეკის შემდეგ განაცხადა.

"ბინაში დილის 07:00 სთ-ზე შემომიცვივდნენ. ჩაცმაც არ დამაცადეს. გაიტაცეს ჩემი დანაზოგი და წავიდნენ. ერთი რუბლიც არ დამიტოვეს. ფულს სახლში ვინახავ და ამაში ცუდს ვერაფერს ვხედავ. ცხოვრებაში პირველად ვარ სიტუაციაში, როდესაც ჩემი მეგობრებისგან ფულის სესხება დავიწყე. ამასთან საყვარელი მამაკაცის მიმართ მიწერილი ჩემი წერილები ხმამაღლა წაიკითხეს და დამცინეს. ეს ყველაფერი გაკეთდა უკანონოდ - ისე, როგორც ზოგადად რუსეთში ხდება", - განუცხადა ჟურნალისტებს ქსენია სობჩაკმა.

შეგახსენებთ, რომ 6 მაისს რუსეთში გამართული მილიონიანი მარშის თაობაზე რუსი ოპოზიციონერების ბინები გაჩხრიკეს, მათ შორის ქსენია სობჩაკისაც, შემდეგ კი ისინი, პოლიციაში დასაკითხად დაიბარეს.